 |
| ក្រុមកម្មករហែក្បួនប្រារព្ធទិវាពលកម្មអន្តរជាតិ លើកទី១៣០ នៅថ្ងៃទី១ ខែឧសភា ឆ្នាំ២០១៦។ |
គ.ជ.ប. ថា, គ្មាន សិទ្ធិ បញ្ជា ឲ្យរោងចក្រ អនុញ្ញាត ឲ្យកម្មករ ឈប់ ៣ថ្ងៃ ដើម្បី ទៅបោះឆ្នោត
RFA / វិទ្យុ អាស៊ី សេរី | ៣០ ឧសភា ២០១៧
គណៈកម្មាធិការ ជាតិ រៀបចំ ការបោះឆ្នោត (គ.ជ.ប.) អះអាង ថា, ខ្លួន មានសិទ្ធិ គ្រាន់តែ អំពាវនាវ ទៅម្ចាស់ រោងចក្រ, សហគ្រាស ជួយសម្រួល ឲ្យកម្មករ បានឈប់ សម្រាក ដើម្បី ទៅបោះឆ្នោត ជ្រើសរើស ក្រុមប្រឹក្សា ឃុំ-សង្កាត់ នៅថ្ងៃ ទី៤ ខែមិថុនា ទេ, ប៉ុន្តែ ពុំ មានសិទ្ធិ បង្គាប់បញ្ជា ទៅក្រុមហ៊ុន រោងចក្រ ទាំងនោះ ថា ត្រូវតែ អនុញ្ញាត ឲ្យកម្មករ ឈប់ ទៅបោះឆ្នោត នោះទេ។ រីឯ មន្ត្រី សង្គមស៊ីវិល និងសហជីព សម្ដែង ការសោកស្ដាយ។
ស្របពេលដែលការបោះឆ្នោតខិតជិតចូលមកដល់នោះ ខាង គ.ជ.ប និងក្រសួងការងារ នៅតែមិនទាន់អាចចេញសេចក្ដីណែនាំជូនរោងចក្រសហគ្រាសស្ដីពីការឈប់សម្រាកដើម្បីបង្កលក្ខណៈងាយស្រួលឲ្យកម្មករ កម្មការិនីមានឱកាសទៅបំពេញកាតព្វកិច្ចបោះឆ្នោត នៅថ្ងៃទី៤ ខែមិថុនា នៅតាមឃុំ-សង្កាត់ ដែលខ្លួនបានចុះឈ្មោះបោះឆ្នោតនៅឡើយ។
អ្នកនាំពាក្យ គ.ជ.ប លោក ហង្ស ពុទ្ធា ថ្លែងថា ច្បាប់បោះឆ្នោតថ្មីនេះ គឺ គ.ជ.ប មានសិទ្ធិត្រឹមតែអំពាវនាវប៉ុណ្ណោះ ប៉ុន្តែពុំមានសិទ្ធិដាក់កំហិតទៅថៅកែរោងចក្រ សហគ្រាស សណ្ឋាគារ ភោជនីយដ្ឋាន និងគ្រឹះស្ថានទាំងអស់នៅប្រទេសកម្ពុជា ត្រូវតែផ្ដល់ថ្ងៃឈប់សម្រាករយៈពេល ៣ថ្ងៃដល់កម្មករ កម្មការិនី ដើម្បីបានទៅចូលរួមបោះឆ្នោតនោះទេ។ យ៉ាងណាក្តី លោក ហង្ស ពុទ្ធា បន្តថា គ.ជ.ប បានត្រឹមតែជួយសម្រួលនៅតាមគណៈកម្មការរៀបចំការបោះឆ្នោតឃុំ សង្កាត់ ឲ្យកម្មករមានសិទ្ធិបោះឆ្នោតមុនគេ ដោយគ្រាន់តែបង្ហាញប័ណ្ណកម្មករ។
ការឆ្លើយតបនេះ បន្ទាប់ពីគណបក្សសង្គ្រោះជាតិ សហជីពសេរីកម្មករ និងក្រុមអង្គការសង្គមស៊ីវិល បានដាក់លិខិតស្នើសុំទៅ គ.ជ.ប ជួយជំរុញទៅគ្រប់ម្ចាស់សហគ្រាស ក្រុមហ៊ុន រោងចក្រ សណ្ឋាគារ ភោជនីយដ្ឋាន និងគ្រឹះស្ថានទាំងអស់នៅកម្ពុជា អនុញ្ញាតឲ្យកម្មករឈប់សម្រាក ៣ថ្ងៃ ព្រមទាំងបើកប្រាក់ឈ្នួលមុនកំណត់ ដើម្បីឲ្យពួកគាត់បានទៅបោះឆ្នោតជ្រើសរើសក្រុមប្រឹក្សាឃុំ-សង្កាត់ នៅថ្ងៃទី៤ មិថុនា។
អាស៊ីសេរី នៅមិនទាន់អាចសុំការឆ្លើយតបពីអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ លោក ហេង សួរ បាននៅឡើយទេ នៅថ្ងៃទី៣០ ឧសភា ដោយទូរស័ព្ទចូលមិនមានអ្នកទទួល។
នាយកប្រតិបត្តិនៃគណៈកម្មាធិការអព្យាក្រឹត និងយុត្តិធម៌ដើម្បីការបោះឆ្នោតដោយសេរី និងត្រឹមត្រូវនៅកម្ពុជា ឬហៅថា អង្គការនិចហ្វិក (NICFEC) លោក សំ គន្ធាមី មានប្រសាសន៍ថា លោកមិនអាចទទួលយកបានឡើយចំពោះការលើកឡើងរបស់ គ.ជ.ប.។ លោកបន្តថា ខាងអង្គការសង្គមស៊ីវិល អស់លទ្ធភាពក្នុងការតស៊ូមតិហើយ ដោយសារការបោះឆ្នោតកាន់តែខិតជិតចូលមកដល់។ ទោះយ៉ាងណា លោកសម្ដែងការសោកស្ដាយចំពោះពលរដ្ឋដែលអាចបាត់បង់សិទ្ធិបោះឆ្នោតដោយសារគ្មានពេលវេលា។
រីឯប្រធានសហភាពការងារកម្ពុជា លោក អាត់ ធន់ ក៏បានរិះគន់ក្រសួងការងារ និងស្ថាប័ន គ.ជ.ប ថ្មីនេះថា ពុំបានឆ្លុះបញ្ចាំពីស្ថានភាពរបស់កម្មករឡើយ។ លោក អាត់ ធន់ បន្តថា លោកពិតជាសោកស្ដាយ ប្រសិនបើកម្មករខ្មែរនៅក្នុងប្រទេសត្រូវបាត់បង់សិទ្ធិបោះឆ្នោត ខណៈពលករខ្មែររាប់ម៉ឺននាក់នៅក្រៅប្រទេសប្រឈមការបាត់បង់សិទ្ធិបោះឆ្នោតរួចទៅហើយនោះ។
លោកថា គ.ជ.ប ត្រូវធានាថា ពលរដ្ឋគ្រប់រូបត្រូវមានសិទ្ធិបោះឆ្នោត ឲ្យសមនឹងការទទួលខុសត្រូវរបស់ខ្លួន ដោយមិនគួរយកលេសថា ឥឡូវនេះកម្មករគេអនុញ្ញាតឲ្យបោះឆ្នោតនៅទីតាំងកន្លែងរស់នៅក៏បាន ឬស្រុកកំណើតក៏បានឡើយ។
ប្រទេសកម្ពុជា មានរោងចក្រកាត់ដេរសំលៀកបំពាក់ និងផលិតស្បែកជើងជាង ១ពាន់ (១.០៧៩) និងមានកម្លាំងពលកម្មបម្រើការងារក្នុងវិស័យនេះជិត ៨សែននាក់ ដែលភាគច្រើនជាកូនចៅរបស់អ្នកស្រុកស្រែចម្ការ។ ដោយសារតែនៅពេលបោះឆ្នោតម្តងៗ កម្មករមួយចំនួនត្រូវធ្វើដំណើរត្រឡប់ទៅស្រុកកំណើតវិញដើម្បីបោះឆ្នោត ទើបបណ្ដាលឲ្យមានការបារម្ភថា ប្រសិនបើថៅកែរោងចក្រមិនអនុញ្ញាតឲ្យពួកគេឈប់សម្រាកគ្រប់គ្រាន់ ដើម្បីធ្វើដំណើរទៅវិញទៅមកទេ កម្មករទាំងអស់នោះនឹងបាត់បង់សិទ្ធិបោះឆ្នោតរបស់ខ្លួន៕
Why didn't the f....monkey Hun Sen's regime make such laws ?
ReplyDeleteRemember it took only ONE week for monkey Hun to
make law outlawing Mr. Sam Rainsy !!!